Старшыня Партыі БНФ Лявон Баршчэўскі заяўляе пра неабходнасць перафарматавання Аб’яднаных дэмакратычных сілаў. Прычынай сталі заявы кіраўніка БСДП “Грамада” Анатоля Ляўковіча, зробленыя ім у інтэрв’ю газеце «Советская Белоруссия».

Лявон Баршчэўскі збіраецца востра паставіць пытанне перад прэзідыумам Аб’яднаных дэмсілаў. Паўнамоцтвы Анатоля Ляўковіча, як старшыні АДС павінны быць спыненыя. Таксама мусіць быць прыпынена сяброўства БСДП у дэмакратычным аб’яднанні. Да часу пакуль партыя не адмяжуецца ад выказванняў Ляўковіча ў падтрымку Аляксандра Лукашэнкі і не зменіць свайго старшыню:

- Бо дэмакратычныя сілы, гэта тыя сілы, якія выступаюць супраць антыдэмакратычнага рэжыму. На гэтай канстатацыі стваралася АДС. Калі абвяшчаецца воля да актыўнага супрацоўніцтва з рэжымам, значыць з дэмакратыяй гэта не мае нічога агульнага. Гэта іх унутрыпартыйная справа, але і наша пазіцыя цвёрдая. Такога саюзніка, як старшыня БСДП “Грамада” мы не хочам мець, і з такім саюзнікам супрацоўнічаць.

Калі калегі па кааліцыі не падтрымаюць прапанову Лявона Баршчэўскага, партыя БНФ пакіне шэрагі Аб’яднаных дэмакратычных сілаў. Пытанне Анатоля Ляўковіча будзе паднята на пасяджэнні прэзідыуму АДС 22 красавіка.

Паводле Радыё Рацыя