Заангажаваныя камэнтатары пастараліся ўвагнаць у масавую сьвядомасьць стэрэатыпную трактоўку апошняга зьезду БНФ: непазьбежная зьмена пакаленьняў, прыход "маладой каманды"... Прапаную кожнаму зрабіць няхітрую матэматычную апэрацыю ды пераканацца: сярэдні ўзрост ранейшага кіраўніцтва (старшыня й намесьнікі) - 42 гады, новага - 41 год. Так што не пацьвярджаецца альгебрай гармонія.

Але мне йдзецца пра іншае.

Пра палітычны сэнс барацьбы на зьезьдзе сказана ўжо і яшчэ будзе нямала. А палітыка - рэч асабовая, пэрсаніфікаваная.

Зразумела, навуковыя ступені альбо званьні не абавязкова сьведчаць пра значнасьць постаці носьбіта. І ўсё ж зноў да матэматыкі.

У ранейшых Сойме і Палітычнай камісіі былі тры дактары навук - Ю.Хадыка, Р.Ганчарова ды І.Лаўроўская; пяць кандыдатаў навук - П.Садоўскі, В.Голубеў, Л.Баршчэўскі, С.Мальчык, С.Міхноў. Цяпер засталіся Ю.Хадыка, донкіхот, які нязломна бароніць свае прынцыпы перад ухмылкамі абыякавай аўдыторыі, ды С.Мальчык.

У ранейшым Сойме былі дэпутаты ВС легендарнага 12 скліканьня П.Садоўскі, В.Голубеў, Л.Баршчэўскі, Г.Сямдзянава. Не засталося ніводнага. Як не засталося галоўнага рэдактара газэты "Наша слова", аднаго з найбольш заслужаных змагароў за беларушчыну Станіслава Судніка, іншых вядомых краіне постацяў.

Ніводзін з заснавальнікаў БНФ - сяброў Аргкамітэту й першага Сойму - якія засталіся ў палітыцы, не падтрымаў "новай лініі". Больш за тое. Адзін з "айцоў-заснавальнікаў" Фронту Алесь Бяляцкі пасьля зьезду ўвогуле бязь лішняга шуму выйшаў з партыі.

Зь якімі знакавымі, пазнавальнымі людзьмі - сябрамі Фронту зьбіраецца асацыявацца ў грамадзкай сьвядомасьці цяперашняе кіраўніцтва Партыі БНФ? Чые імёны і фатаздымкі, акрамя сябе і Мілінкевіча, будзе ўключаць у буклеты й брашуры? Якую фронтаўскую традыцыю прадаўжае? Загадка. А можа цяпер гэта і ня трэба?