Рашэнне стварыць стала дзеючую кансультацыйную пляцоўку для палітычных партыяў і дэмакратычных арганізацыяў было прынятае сёння на паседжанні Рады БНБ. 7 снежня тыя з суб’ектаў апазіцыі, хто адзавецца на запрашэнні БНБ, сустрэнуцца на сядзібе БНФ.

Чаму спатрэбілася ствараць кансультацыйную пляцоўку, калі яшчэ днямі месца для кансультацыйных сустрэч пакідалі за кааліцыяй АДС, распавёў у інтэрв’ю “МЫ” старшыня Партыі БНФ Аляксей Янукевіч.

- АДС маглі застацца добрай кансультацыйнай пляцоўкай, але, на жаль, вядомае рашэнне некаторых суб’ектаў працягваць імітаваць шырокую і шчыльную кааліцыю не пакінула АДС аніякіх шанцаў адыгрываць ролю такой пляцоўкі.

Цяпер, на думку Янукевіча, якраз “будзе абсалютна своечасовым, патрэбным і актуальным, калі такая пляцоўка пачне існаваць”.

- Вельмі важна, каб яна існавала на сталай аснове. Каб было ўсведамленне, што тут, перадусім, узгадняем пазіцыі, каардынуем дзеянні, таму, адпаведна, няма рэальна ніводнага суб’екта, каго б мы не бачылі ў працы на гэтай пляцоўцы. Запрашэнні будуць накіроўвацца самаму шырокаму колу – пачынаючы ад Кансерватыўна-Хрысціянскай Партыі БНФ і скончваючы Партыі камуністаў Сяргея Калякіна, якая сёння называецца Беларуская партыя аб’яднаных левых “Справядлівы свет”.

Сябар Рады БНБ Аляксей Янукевіч спадзяецца, што “ўсе суб’екты ўсё ж такі пагадзяцца, бо аб’ектыўна ёсць неабходнасць у дыялогу, неабходнасць размаўляць і ўзгадняць нейкія падыходы”.

- Відавочна, што гэта не магло б адбывацца ні ў межах АДС, ні ў арганізацыях, якія сёння чамусьці прэтэндуюць называцца Аб’яднанымі дэмакратычнымі сіламі. Не магло б нават і ў межах БНБ, які мы лічым сёння найбольш моцнай і перспектыўнай кааліцыяй, бо патрабуецца вельмі шырокі фармат удзельнікаў. Таму мы і выступілі з гэтай ініцыятывай.

Нагадаем, Беларускі незалежніцкі блок быў прэзентаваны 27 кастрычніка гэтага году. У яго ўвайшлі Рух “За свабоду”, арганізацыі “Правы альянс”, “Малады фронт”, “Маладая Беларусь”, “Маладыя дэмакраты”, Партыя БНФ, а таксама партыя, што перабывае ў працэсе рэгістрацыі, - Беларуская хрысціянская дэмакратыя.

Паводле www.belmy.by