Эўрадэпутат Ф.Качмарэк у абарону Т.Шапуцькі, І.Шылы, Ф.Вячоркі

На пленарным паседжаньні Эўрапейскага Парлямэнту дэпутат Філіп Качмарэк выступіў у абарону Т.Шапуцькі, І.Шылы і Ф.Вячоркі

Адной з найчасьцей ужываных і штораз мацнейшых рэпрэсіяў супраць апазыцыйных беларускіх студэнтаў ёсьць выключэньні з унівэрсытэтаў. Калі гэта мужчыны, выключэньне цягне за сабой неадкладны прызыў у войска, прычым без увагі на стан здароўя. Так здарылася з Франакам Вячоркам ды Іванам Шылам. Ніжэй падаем выступ дэпутата Філіпа Качмарка ў дыскусіі на тэму Беларусі на пленарным паседжаньні Эўрапейскага Парлямэнту ў Страсбургу.

“Спадару Камісар, Шаноўнае Спадарства,

Тут ішла гаворка аб патрэбе моладзевых і культурных абменаў паміж Эўрапейскім Зьвязам і Беларусьсю. Баюся, што гэта будзе вельмі цяжка.
3 сьнежня прэс-сакратарка арганізацыі Малады Фронт Тацяна Шапуцька была выкрасьленая са сьпісу студэнтаў юрыдычнага факультэту Беларускага дзяржаўнага ўнівэрсытэту.

І за што яе выключылі?

За ўдзел у форуме на тэму Ўсходняга Партнэрства ў Брусэлі. Улады ўнівэрсытэту палічылі, што яна выехала бязь іхнае згоды, чаму і была выкінутая з вучэльні. Для жанчыны ў гэтай краіне, магчыма, гэта ня так небясьпечна. (…) Для мужчын, выкінутых з унівэрсытэтаў у Беларусі, наступствы гэтага могуць быць больш балючыя. Таму што вайсковая служба ў Беларусі трактуецца як пакараньне, як замена турэмнага зьняволеньня. Ёсьць маладыя салдаты – такія, як Франак Вячорка, лідэр моладзевай арганізацыі Беларускага Народнага Фронту, Іван Шыла з арганізацыі Малады Фронт, якіх перасьледуюць падчас вайсковай службы. Ім абсякаюць доступ да інфармацыі, а іхную службу разглядаюць як пакараньне. Мы павінны змагацца з гэтым і падтрымліваць тых, каго караюць такім чынам.

Вялікі дзякуй”.

Кантэкст падзеяў

Прэс-сакратарка апазыцыйнай арганізацыі “Малады Фронт” Тацяна Шапуцька 3 сьнежня за ўдзел у форуме ў рамках праграмы “Ўсходняе партнэрства” ў Брусэлі была выкрасьленая са сьпісу студэнтаў юрыдычнага факультэту Беларускага дзяржаўнага ўнівэрсытэту. Улады ўнівэрсытэту палічылі, што яна выехала бязь іхнае згоды, чым парушыла статут навучальнай установы.

Намесьнік старшыні арганізацыі “Малады Фронт” 18-гадовы Іван Шыла быў выключаны са школы ў чэрвені 2008 г., напярэдадні апошняга выпускнога экзамэну, што пазбавіла яго магчымасьці паступіць ва ўнівэрсытэт. Выдалены са школы ён быў за палітычную дзейнасьць. Выключэньне ёсьць парушэньнем ягонага права на заканчэньне сярэдняй школы, гарантаванага беларускім заканадаўствам.

Падчас зімовага прызыву была неадкладна скліканая прызыўная камісія, дактары якой на загад супрацоўнікаў КГБ падмянілі вынікі мэдыцынскіх дасьледаваньняў (паводле інфармацыі “Маладога Фронту”) і палічылі Івана прыдатным да вайсковай службы. 29 студзеня Іван Шыла быў накіраваны ў 29-ю зэнітна-ракетную частку ў Віцебскай вобласьці.

Франак Вячорка быў выключаны з унівэрсытэту, бо не зьявіўся на іспыты. Прычына – чарговая турэмная адсідка за апазыцыйную дзейнасьць (ён – старшыня моладзевай арганізацыі БНФ). Яму анулявалі студэнцкую адтэрміноўку ад вайсковай службы. У чэрвені 2008 г. Ф.Вячорку адтэрмінавалі службу з прычыны апэрацыі на вачох. У ліпені 2008 раённая прызыўная камісія прызнала яго непрыдатным да вайсковай службы ў мірны час з прычыны скрыўленьня хрыбта і плоскаступнёвасьці. У верасьні 2008 г. з прычыны падвышанага крывянога ціску ён атрымаў яшчэ адну адтэрміноўку да сакавіка 2009 г., калі стан ягонага здароўя меў быць паўторна спраўджаны. Ф.Вячорка мае артэрыяльную гіпэртэнзію 2 ст. і пралапс мітральнага сардэчнага клапана.

Апошнім часам разам зь іншымі салдатамі часткі Ф.Вячорка быў шпіталізаваны ў г.Мазыры зь “нявызначаным” гатункам грыпу і вельмі нізкім агульным імунітэтам. Дактары падчас абсьледаваньня пацьвердзілі сур’ёзныя праблемы з сэрцам і крывяным ціскам. Спэцслужбы загадалі неадкладна спыніць далейшае абсьледаваньне і выпісаць яго са шпіталя ў казарму, хоць ён надалей кепска пачуваўся і меў падвышаную тэмпэратуру (37,6°).
Франак Вячорка быў караны з прычыны таго, што паўтараў каманды афіцэра па-беларуску. Палітычныя афіцэры ўжывалі розныя спосабы псыхалягічнага ціску на яго, у тым ліку ізаляцыю ад інфармацыі, цэнзуру лістоў, газэтаў і кнігаў, перасьлед за публікацыі ў незалежнай прэсе ды інтэрнэце. Інфармацыйная праграма дзяржаўнага тэлебачаньня і афіцыйная “Белорусская военная газета” падрыхтавалі некалькі паклёпніцкіх матэрыялаў пра Ф.Вячорку.

Гэта толькі некаторыя з шматлікіх рэпрэсіяў такога кшталту ў Беларусі.

Дэпутацкае бюро Ф.Качмарэка

20 сьнежня 2009

Раздрукаваць

Эўрадэпутат Ф.Качмарэк у абарону Т.Шапуцькі, І.Шылы, Ф.Вячоркі

Па гэтай тэме:

Выбараў не будзе - будзе іх імітацыя

Вадзім Канапацкі падаў дакумэнты на вылучэньне ў кандыдаты ў дэпутаты

Як суадносяцца мытныя пошліны і падаткі?